Ba'ax le video serie Máaxo'oni'
U tuukulil le videoseriea' ka u jóok'es tsikbalo'ob ti bix maaya kaaj yéetel u nojba'alil u t'aan.
-
Le videoserie Máaxo'oni' ku taasik ba'alo'ob unaj u káajal u tsikbalta'al ich kaaj. Ku yóotik u ye'es u jejeláasil bix jump'éel maaya kaaj wa kajnáalo'obo', le ma suuk u ya'ala'al wa u yila'alo', tumen yan u jeel tuukulo'ob yéetel tsikbalo'ob, jach ku t'i'itbesal tumeen jala'acho'ob, beey xan ti' jéejelas kúuchilo'ob yéetel chíikulalo'ob je'e bix radio, televisión, naajil xook, publicidad, yéetel uláako'ob.
Le tukulo'ob bey ti le tsikbalo'oba', ku pixik u jaajil bix maaya kaaj yéetel u noj ba'alil u t'aan, beey xan ku yoksik sublakil ichil u tuukul wíinik yéetel yo'olal ba'axo'ob je bix: tu'ux u taal, bixo'ob, bix u kuxtalo'ob, bey tuno' jujump'íitile' yéetel tu yóo'lal beka'aj ja'ab jo'op'ok u k'i'itbesa'al le tuukul wa k'aak'as tsikbal t óo'lalo', bejla'e tuláakal le ba'alob múuk'ankúunsiko'one', tu bin u sa'atal, tumen ku beetal k p'atik ti'al ma' k péech'óolta'al, kex túune', bey chéen k ts'aik mascara ti'al k ta'akik jach maaxo'one'.
Le óolal tune le videoseriea' ku káajsik jump'éel tsikbal unaj u chukpesa'al tumen u kajnáalilo'ob k kaajal.
Le videoseriea' jatsa'an ti' 8 jump'éelal capítulos ma' tu máan ti' 7 minutos. Cada capítulo je'el u páajtal u wejk'esik u yúuchul tsikbal t óo'lale', máaxo'oni', tu'ux yano'on, tu'ux k bin, ba'ax ku taal tu paachil k'iin.
Bix síijik le video serie Máaxo'oni'
-
Le tuukulo'oba molchaja'an ichil k kaajal yeetel ichil kajnáalo'ob, le videoseriea' jóok' ti' le ba'ax ku taaktal k núukikik mantats', ikil u k'áata'al, ba'axten táan u xu'ulul u t'aanal le Maayao'. Ti je ba'ax respuesta ka ts'áake' tu paache' ku chíikpajal táan u p'áatal tumen ku tukulta'al ma' k'áanani', ma' jats'utsi', ba'ale' bey xan yan ba'al u yil yéetel pech' óolalil.
U Péekbal Waye' ku tukultik unaj k xak'altik tuláakal le tuukulilo'oba' ti'al k na'atik tu'ux u taal éetel wa yan uláak' bix je'el k paktik, k na'atik, k tukultik k t'aan yéetel k miatsil.
-
Video serie
Maaya kaaje kuxa'an
Yáax capitulo
U tuukul jejeláas máako'ob tu'ux ku chíikbesiko'obe' maaya kaaje' ma' bin mix tu'uxi', ma' sa'ati', láayli weyano'one'.
-
Ichil le yáax capituloa' ku núukik k'áatchi'ob je bix:
- Ch'éej wáaj le maaya'obo'.
- Tu'ux ts'o'ok le maayaso'obo'.
- Tu'ux yaan le maaya'obo', bix u ya'alikuba' u paalal le úuchben kajnáalo'ob te péet lu'uma'.
- Ba'ax ku ye'esik wa ba'ax u nojba'alil le úuchben ts'íib yéetel wojo'obo'.
- Le bix u na'atiko'ob wa u xokiko'ob k'iino'ob ka'achilo', bix u chíikpajal ichilo'on bejla'e.
- Ba'ax úuch yéetel maaya kaaj ka k'uch le sak wíiniko'. Ba'ax láayli kuxa'an tak te k'iino'oba'.
- Ba'axo'ob ti le tu taasaj le sakwíiniko'obo' maaya kaaje' tu ti'alintaj ti'al u nupik u muuk'o'ob.
- Bixij wa ba'ax ti' ba'alilo'ob k ilik u muuk' kaaj tak walkila'.
- Bix tu tokajilubáaj kaaj ti' ba'ax ku beetik jala'ach.
Máaxo'oni'
Capitulo dos
Jaaj wáa xúulxa'ab le maayao'ob ka jtaal le sak wíiniko'obo', jaaj wáa yanchaj jump'éel colapso maaya.
Tukulo'ob ti jejeláas winiko'ob ti bix u yu'ubikuba'ob wa u ya'alik máaxo'ob, ba'axo'ob.
Máako'ob jach chíika'an u pe'echak'o'ob ti u nojba'alkunsa'al maya t'aan.
-
Ti'al u saasiltal le capituloa' ku núukik k'áatchi'ob je bix:
- Máaxech, bix u kuxtal juntúul maaya.
- Máaxech ka'ach, ichil a kaajal, kux túun bejlae'.
- Ba'axten yanchaj a náachtal ti' a kaajal.
- Ba'ax talamil ta máansaj ikil a sut ichil a kaajal meyaj.
- Ba'ax líik'sik a wóol ti'al a we'esik a t'aan yéetel a kaajal.
- Ba'axo'ob táan u taal a p'atik ti'al a kaajal, a t'aan.
- Ba'ax bejil táan a je'ik ti'al a t'aan ichil a kaajal yéetel ti'al uláak' máako'ob.
- Ba'ax noj tuukulil je'el a wa'alik ti' a paalal, a wéet kaajalo'ob tu yóo'lal a t'aan, u noj ba'alil a kaajal.
K t'aane' k muuk'
Capitulo tres
U tuukul kajnáalo'ob, ts'o'ok u jóok'olo'ob táanil, ikil ku t'aniko'ob maaya, ba'ale', beey xan máaxo'ob ku ye'esiko'ob beka'aj ba'al je'el u sa'atal wa ku ch'éejel le t'aano', tu ts'ooke', ba'ax talamil ku máansik máax ma' u yojel le t'aan ichil maya kaajo'.
-
Ichil le capituloa' ku núukik k'áatchi'ob je bix:
- Ba'axten ku tukulta'al k'áana'an le maaya t'aano'.
- Ba'ax utsil ku taasik tak kuxtal.
- Ba'ax ku taasik tu kuxtal juntúul máak wa tun jáawal u t'a'anal u t'aan.
- Ba'ax talamilo'ob ku taasik wa ma' k t'aan ich maaya.
- Ba'ax ku taasik tu paach u bin u jáawal u t'a'anal jump'éel t'aan.
- U bin u ch'éejel wáa u sa'atal jump'éel t'aane', ba'ax beetik.
- Ti' ba'ax jach chíika'an u bin u sa'atal jump'éel t'aan.
- Ba'ax talamil k máansik ikil ma' k ojel t'aan ich mayai.
- Chúukbes le chan tuukula': k t'aane' k muuk' wa…
U muuk'il k t'aan 1
Capitulo cuatro
Ba'ax je'el a wa'alik ti' juntúul papajtsil táan u kaansa'al u paalal ich maya tu escuela'obe'.
-
Ichil le capitulo'a yaan k u'uyik u t'aan, u tuukul jejeláas máako'ob, ko'olelo'ob ts'o'ok u máan k'iin u yoks tu tuukulo'ob u k'a'ananil u ch'ikikubáaj wíinik u meyajt to'al u tóoch'ta'al u yóol le t'aano', leti' beetike', úuch jo'op'ok u yilik u yoksiko'ob ichil u najil xook ti'al u yúuchul kaansaj, beey xane', yaane', táan u kansik ka t'a'anak, ka ts'íibta'ak yéetel ka xo'okok le t'aano'. U láak' bix je'el u ye'esa'al u noj ba'alil le t'aano', leti' le meyaj ku káajal u tóoch'ta'al te k'iino'oba', le u na'atpajal le t'aano', wa ma' k t'anik k mejen paalal, k láak'ob je'ex k sukuno'ob, kiiko'ob, íits'ino'ob, tiiyos, tiiyas, wa tak k éet bisajbailo'ob ich mayae', ma' bíin ya'abak máak tu paach le ba'ax k ts'íiboltika'.
U muuk'il k t'aan 2
Capitulo cinco
Ba'ax je'el a wa'alik ti' juntúul papajtsil táan u kaansa'al u paalal ich maya tu escuela'obe'.
-
Ichil le capitulo'a yaan k u'uyik bix u yu'ubikubáaj máaxo'ob táan u síijsiko'ob ba'alo'ob ti'al náaysaj óol wa báaxal/kaambal ichil maya, je'el bix ti'al mejen paalal, wa je'el máakamáak kajnáalile', beey xan, ba'ax ts'o'ok u máansiko'ob ti'al u béeytal le ba'axo'ob yaan walkila', ba'ale', ba'ax ku binetik, bix je'el k áantaj wa k táakbesikbáaj ichil le meyajo'.
U muuk'il k t'aan 3
Capitulo seis
Le maayao' ma'atech u ba'atel yéetel mix ba'al, mix yéetel túumben ba'alo'ob, leti' beetik'e le u bin u mu'uch'ul xóoxot' t'aano', yaan u ts'aik u páajtalil u mu'uk'a'antal ti' ba'alo'ob digitalo'ob, programación, aplicaciones ichil ya'ab ba'al ku bin u síijil sáansamal.
-
Ichil el capitulo'a ku chíikbesa'al wa ku ts'aabal k'ajóoltbil ich kaaj tak tu'ux ts'o'ok k náakal wa jayp'éel joolnaj ts'o'ok k je'eik ti'al maaya t'aan. Je'el bixe', walkila' yaan dependencias ti' gobierno, tu'ux ku béeytal k k'uchule' je'el k ts'aatáanta'al ichil mayae', ba'ale' wa ma' xan tek ti'alintik le kúuchilo'ob beyo', ñeti' beetik k kukulpaach. Uláak'e', walkila' ya'ab máake' ikil u yojelo'ob mayae' yaan ti'ob jump'éel meyaj, wa ku bin utsil ti'ob yéetel ba'ax u yojelo'ob. Ba'ale', yaan xane', ikil mina'an le t'aan ti'obo', láayli ts'o'ok xan u máansiko'ob noj talamile', leti' beetik k'a'ana'an u chíikpajale' le t'aano', yaan u noj ba'alta'al jach ma' tun xáantal.
U paakatil kaaj
Capitulo siete
K t'aane yaan futuro ti'.
-
Ichil le capitulo'a, yaan k u'uyik u t'aan máaxo'ob ts'o'ok u máan k'iin jo'op'ok u beetiko'ob u juum maaya t'aan ti kúuchililo'ob je bix radio, televisión, periódico wa uláak' plataformaso'ob ti'al u k'i'itbesa'al información, ba'ale', beey xan ku ya'aliko'ob to'on bix je'el u ya'abtal le meyajo'ob yaan walkila' ti'al ka béeyak k náaysik k óol yéetel k kaajal.
U beejil k t'aan u beejil kaaj
Capitulo ocho
Ba'axo'ob ku náayta'al tumen le máaxo'ob ku táakpajlo'ob ichil u péekbal waye'.
-
Ichil le capitulo'a yaan u yu'ubpajal ba'ax le péekbalo', bix síijik, ba'ax bejil táan u bin u je'ik, jaytúul máak táakbesik tak bejlae, ba'ax ku taal uti'al ma' nach k'ini'.
Ba'ale' beeyxan yaan u núukpajal le k'áatchi' jach suuk u beeta'al, wa mix tech beetik tumeen k tukultike' ma' tsaji', k páatik ka núuke'; Bix yanil le t'aan ichil a wotoch, a kaajal, a baatsilo'ob wáa ta weetel mismo. Le núukilo' yaan u jook'ol ti' jump'éel chan ejercicio ku béeytal u beetik je'el máaxake', je'el ba'axak súutukile'.
¡Táakbesabaj!
Wa ka tukultik yaan ba’ax ku béeytal a táakbesik ichil le péekbalo’, wa beey xan tumeen ta beetaj le chan ejercicio ti’, bix yanil a t’aano’, ka ta wilaje’, k’a’abéet a káajsik a beetik wa ba’ax, ba’ale’, ma’ a wojel ba’ax wa bixi, je’elo’ k íinbitartikech ti’al ka nats’abáaj ti’ le máaxo’ob yaan ichil le péekbalo’.